今日本來要去代一個幾星期既代課，但係我代左半日已經覺得課擔唔係路，首先一日十堂，真係好crazy，忙到抽唔到時間泵奶(呢樣野係冇得遷就既，因為所有代課以唔影響 Josie 妹食人奶為大前提)，趕到死死下，仲要係要借用學校醫療室，冇得lock, 一路泵一路怕有人唔小心開門(接呢單代課前，已向搵我代課既副校提出我必需要中午泵一次人奶。)
一早番到去就，未上堂就俾人捉左去開備課會；帶完學生放學諗住可以抖抖，點之副校話要到禮堂睇學生做功課，全校既老師都係咁，直至法定放學時間先可以離開禮堂(事前冇講過，仲要暗示大部分老師都係留到好夜先走)。
最最最大問題係將要考試，勁多書未教晒，好多習作要趕住做，有乜理由要一個代課追趕進度，我計過要一個星期內教2-3課書，點教?!
就算極速教完，相信學生都唔會吸收得到。
種種因素之下，我唔想代落去，所以向副校長請辭，我知係變相一鑊翹起佢(點講都係我唔o岩)，但我真係頂唔到，同埋頂到都會唔開心，咁何必呢!
代得輕鬆、代得開心係我代課既大原則。
副校非常唔高興，講左D說話令我一D都冇後悔唔幫佢代落去，最後仲要攞校長黎撻我，不過我係唔會驚既……見完校長，件事總算告一段落。
成件事從開初接代課起，一直同呢個副校溝通，通話次數唔算多，加埋當面傾過計，我好想講呢個副校真係超唔掂，好少遇到咁既質素既副校。
( 一枱都係要改既簿，加上今日中文默書，超灰！ )
( 雖然提早請辭，但今日既工作我一定做足晒既，改晒所有簿 )
( 寫低晒批改左咩功課同埋每一班教到邊度等等…… )
沒有留言:
張貼留言