2015-08-08~14 R.I.P 懷念你

8月8日凌晨，姐夫突然中風，昏迷不醒。

整個星期，二家姐及一眾家人一直在醫院守候，心情極度難過。

姐夫真係好一個好開心、樂天、好心腸、真誠既一個大好人，唔知點解個天會有咁既安排，我真係好唔捨得你 >.<

由事發開始接了 Ivan 回家照顧，望著四歲半的他，眼淚就爆發了 >.< >.< >.<

整個星期照顧他起居飲食、沖涼、瞓覺、玩，每日接送他到醫院探爸爸，暫時是我唯一可以幫忙的，好讓二家姐可以安心，少一件事要擔心。

生命無常，珍惜每一天。

二家姐，加油，支持你的，姐夫在天家一定會看顧著你和 Ivan 的。

( 姐夫&二家姐@my weddding in 2008, 掛念你，十分掛念你～ )

2015-07-27 naughty kids

本來偷到時間出街 shopping 係一件開心既事，點之返到屋企發現 Josie ＆Max 做左好多曳野!

失望係好多曳野由 Josie 帶頭做，例如喺 Max 張 BB 床爬出爬入，攪到 Max 有樣學樣，以後都唔使旨意安全咁留住 Max 喺床 =.=

整個晚上非常沮喪，覺得自己出一陣街屋企就亂晒籠，咁係咪即係要日日夜夜留喺屋企邊度都唔好去呢?!

希望一個4歲半既小朋友可以自律，是我想太多吧～

2015-07-20 colour of summer~

暑假啦～又唔使代課，唔需要刻意低調，今次 soft gel 整黃色，都係博一博，效果唔錯, like!

2015-07-18 new Union Jack bedsheet, love it!

( 熨直埋應該仲靚d^^ 多謝老公由 London 帶佢返來 ) 

2015-07-11 母女仨@處女星號(Day2)

三日兩夜食、玩、hea、瞓、賭, happy~

兩日戰績：I win $100, 家姐win$600,媽win$900, 皆大歡喜 : )

2015-07-10 母女仨@處女星號(Day1)

難得既機會，隻身跟媽咪同二家姐一齊上船玩，對上一次已經係五年幾前去既寶瓶星號啦，呢幾年真係忙到顛，而家有三日兩夜 relax 下，真係好正~

2015-07-09 生囡真好

送 Josie 入房瞓晏覺，讀一本故事書、傾一陣計叫佢自己瞓。

之後我返左睡房撻喺床睇緊電話, Josie 突然又走出房，佢一入我房我第一時間扮瞓。

佢靜靜地幫我蓋毛毯，左拉右拉要完全 cover 手手腳腳膊頭等等，之後kiss 額頭，輕聲講左句 good night ,再替我關門, 然後返房再睡。

So sweet ~

P.S. Max剩係識得喺人地蓋好毛毯既時候扯走、再掉落地 =.=

2015-06-28 M.A.C. eyeliner

上星期終於試用左朋友仔推介既 liquid eyeliner, 對於十年都唔劃一次眼線(因為覺得難劃)既我黎講真係覺得幾方便易用。

經過喺屋企練習左兩次之後感覺怪怪，劃左外眼線令到內眼成條邊好白唔多順眼。

今日買左枝筆狀眼線筆，原來內眼線係好易劃架，而且效果好自然。

( 呢張就係乜都冇化，剩劃內眼線既樣 )

2015-06-01~03 一連三日扮靚靚^^

乖乖返左成個月工，好好慰勞自己，一連三日扮靚靚^^

2015-05-29 食富豪軟雪糕@學校籃球場

四星期代課今日圓滿結束啦，好開心可以黎到呢間學生代課，學校上上下下既老師、職工同埋 TA 都非常之 nice, 整個工作環境同氣氛都好好^^

今日係學校「盡責」主題既完結日，每班表現最好既五位同學會得到一張雪糕換領券，除左獎食雪糕之外，仲可以喺導修課時間獲得「盡責自由息」，即係可以唔使上班主任課，多左一節小息自由時間。

學校 book 左架富豪雪糕車，泊喺籃球場，每位老師、職工午膳之後都可以去換雪糕, so happy!

喺籃球場有放緊小息既學生想用八達通買雪糕，結果係唔成功既，因為有錢都買唔到架 :P

2015-05-10 Happy Mother’s Day

Josie喺學校親手整既小禮物(棉花糖點蜜糖、再點彩色粒粒糖，放cupcake紙上，最後包裝，另外再用飲管等簡單材料整左朵花）

mama 星期五夜返屋企，但Josie一直喺床上等我.....一開佢房門，佢即時彈起身扒上窗台攞禮物，勁興奮同開心咁同我講"HAPPY MOTHER'S DAY!!!"
之後好努力講解禮物製作過程。

mama : 咁你有冇同婆婆講母親節快樂呀？

Josie : 佢都唔係我媽咪

mama : 咁你知唔知婆婆係我媽咪

Josie : (好疑惑咁既樣）

［mama一直冇為意Josie係唔知呢種關係］

mama : 即係呢婆婆big tummy(大肚)嗰時，mama喺佢個肚裏面，婆婆生我出黎架!

Josie : (更疑惑既樣) 乜你以前係BB黎架？！

Wakaka....Happy Mother's Day!!!

2015-01-29 Josie@happy 4 years old : )

眨下眼就4歲，可以話係全年冇工人既日子，超勁忙，所以時間過得特別快～

4歲既 Josie 真係大個女左好多好多，對 Max 既態度改變係最明顯，至於情緒方面依然會無故大發脾氣，但頻密度低左，發脾氣後冷靜落黎既速度快左，經已係好大既進步，值得一讚。

另一方面退步既係拖延既性格明顯左，換衫、去洗手間、執拾玩具等都成日拖得就拖，借聾耳陳隻耳，討厭經常要同佢討價還價，來年要重點改善!

2015-01-01 元旦行大運@摩天輪

我當自己坐左巨型風車，行左個大運，將2014既衰氣掉走左^^

展望2015身體健康、和和氣氣、事事順利!

2014-12-25 gel甲@重獲自由第二步

繼上月 highlight + 染髮之後，今日去左整 gel 甲。

過去四年半指甲上面都未曾有過顏色，今日趁住聖誕佳節，揀左紅色。

從來未搽過紅色甲油既我，又覺得呢隻顏色都好唔錯喎, good try!

重獲自由第三步會係咩呢?! ……希望快D可以實現埋啦～

( 染髮 + 化妝 + 整指甲 = 好自由。真係好喜歡呢種只需要向自己負責既感覺^^ )

2014-12-22 Max 受傷了

星期六晚既半人為意外，令到 Max 面朝下跌左落地，下唇明顯兩隻牙印，流左好多血，上排牙肉腫晒、流血，隻牙仲好似移左位。

想去港安睇醫生，點之嗰度冇急症，都冇牙科，只好改去仁濟。

醫生檢查晒手、腳、頭、面，再照埋 X-ray, 冇乜事，可以放心回家。

星期日冇得睇牙醫，心情一直忐忑不安，好擔心傷及神經線，會手尾長。因為我細個溜冰既時候都撞親牙，結果攪到要杜牙根，好多年後都係唔舒服，結果要脫牙同種牙，花多好多時間、金錢，同埋受好多痛苦，所以真係好唔想 Max 有事。

2014-11-29 RED

陀Bs+餵人奶，足足五年冇染髮、冇電髮。

慶祝重獲自由，今日向老公請左半日假去salon 剪髮+highlight+染髮。

還是最愛紅色。

2014-11-24 OWC 480GB SSD + Aura Envoy Kit + Parallels Desktop

2011年 macbook air 開始用 SSD, 當年容量好細，只係得 64GB，明知一定唔夠用都照買，因為真係好想感受 SSD 既速度。

今時今日 64GB 算得係咩容量，分分一隻UBS手指都多過佢，成日插住個 external 又覺得唔方便。

用左咁耐，都仲覺得部機好好，冇理由為左個容量買過另一部，所以想換個大D既 SSD, 點之遊走各腦場都搵唔到 for macbook air 既 SSD.

結果要衝出香港，向美國 Other World Computing (OWC) 訂貨，訂到最大都係 480GB, 都好! 都頂得下。

其實年頭 DHL 已好快寄到黎香港，一收到貨已急不及待自己上網學安裝，一 take OK 勁開心。

另外因為某銀行既 e-banking 要用 PC 先上到，加上我間唔中會用 PhotoCap, 之前裝既 bootcamp 好麻煩，用起上黎唔方便，所以一次過訂埋 Parallels Desktop, 以後喺 Mac 同 Windows 之間切換就唔使重新 log in log out. 由年頭忙到而家，終於都安裝好埋啦～

( 三樣野連埋運費，呢個 upgrade 用左 HK$5000 ) 

2014-11-16 倒霉的2014

一月初工人完約返印，預早用$8000 agent fee 重新請一個 oversea 既印傭，遲左黎三個星期，當中已經覺得頂得好辛苦，點之黎左只係 1.5 個月，完全貨不對版，頂唔順買$1500 機票送佢走，agent 都冇幫到咩手，雖然可以半價換另一個，但我已冇信心再花幾個月請另一個可能係類似既物體。

之後朋友介紹經 Hire Me Free 請左個斷約工人，我真係好抗拒斷約嗰D，總覺得係好既，人地就唔會唔用你，自己 break contract 既，break 得人地他日都可以 break 我…… 我要求 agent 幫我聯絡前僱主，想查詢一下佢既工作表現，agent 之後通知我話前僱主話：「人都走左，唔想再講」，我當時衰心急，唔想再過冇人幫既日子，interview 完就請左呢斷約菲傭。

請完又唔安落都係擔心，於是自己跟住個斷約工人既 contract 地址寄左封信俾前僱主，希望佢好心簡單話我知個工人請唔請得過，誰不知前僱主一收到信，知道我要請呢個工人照顧一個一歲三個月既Max，同3歲既 Josie, 即時同我傾左45分鐘詳談呢個工人超級唔掂既工作表現(全日發白日夢、精神不集中、不能跟從指示、練精學懶、得過且過、不可靠、不踏實、不老實、不可信、讓她照顧小朋友好危險、講好多次要啄住先做、講大話、向僱主借糧、博炒……)，與此同時查證得到 agent 根本冇問過佢願唔願意同新僱主對話，擺到明係唔想穿煲。

2014-10-31 祝一路順風～

好開心今日可以送媽咪爸爸機，明早六時大概應該已抵達加拿大。

呢一刻實在非常感動，因為2014年實在發生太多太多既事。

年頭爸爸要做大手術，住院兩個月，兩次深切治療，喺爸爸最需要支持同照顧既時間，媽咪唔能夠去醫院探望。

變成沒有工人忙到顛既我、二家姐同埋兩個姑姐輪流探望，為爸爸買物資、食物、洗面、抺身。

我心深處知道爸爸其實是希望當時照顧他的是媽咪，但當時媽咪身體都有問題，知道媽咪已經好一段日子受痾血既情況困擾，一家人都鼓勵佢搵醫生檢查清楚，但佢偏偏唔願意行呢一步，而去接受親戚介紹既「能量治療」，貼貼紙、食米紙、飲薄荷水、搽好多唔同產品以及到中心接受「治療」，以上種種花費不菲。

治療中既媽咪簡直判若兩人，有如中邪教一樣，行為怪異，談吐都變成另一個人，經常維護呢個團體。

2014-10-25 Full-time Daddy

"I like Sat. It's my full-time daddy day! I can set J's hair, send her to gym class, bring Max to play, let mama goes coffee shop and relax and cook with J. Everybody happy, how great~"  by dad dad