好開心今日可以送媽咪爸爸機，明早六時大概應該已抵達加拿大。
呢一刻實在非常感動，因為2014年實在發生太多太多既事。
年頭爸爸要做大手術，住院兩個月，兩次深切治療，喺爸爸最需要支持同照顧既時間，媽咪唔能夠去醫院探望。
變成沒有工人忙到顛既我、二家姐同埋兩個姑姐輪流探望，為爸爸買物資、食物、洗面、抺身。
我心深處知道爸爸其實是希望當時照顧他的是媽咪，但當時媽咪身體都有問題，知道媽咪已經好一段日子受痾血既情況困擾，一家人都鼓勵佢搵醫生檢查清楚，但佢偏偏唔願意行呢一步，而去接受親戚介紹既「能量治療」，貼貼紙、食米紙、飲薄荷水、搽好多唔同產品以及到中心接受「治療」，以上種種花費不菲。
治療中既媽咪簡直判若兩人，有如中邪教一樣，行為怪異，談吐都變成另一個人，經常維護呢個團體。
團體中人「目測」斷定我媽係大腸嚴重發炎，當時媽咪斷定自己死硬，所以執意繼續治療，而我地一家人都認為媽咪當下最應該做既係大腸內窺鏡檢查，報告自會反映一切。但呢個團體既人話我媽既情況危險至臨界點，用外物檢查都會一觸即發演變成大腸癌。
成世人都怕事無乜主見既媽咪信到十足十，所以極力反對做大腸鏡檢查。
與此同時爸爸既情況好壞，好想見下媽咪，但媽咪覺得平時照顧爸爸時出入醫院後痾血情況會較嚴重。團體中人話佢地有「數據」顯示媽咪唔適宜去醫院，而且醫院有負能量，對我媽有生命危險；如果我媽要去醫院的話，連我爸也會受影響。
成世人最錫我爸既媽咪當然唔夠膽去醫院，如是者兩個月以來我疲於奔命出入醫院照顧爸爸。
爸爸說媽咪已中毒太深，簡直好似被洗腦一樣，話佢已冇得救，叫我放棄，佢亦已經心淡，唔想再見到我媽。
但我肯定爸爸其實仲好著緊媽咪，因為手術後爸爸痛到顛神志不清既時間，佢捉住我手但完全認唔到我，口裏面重覆叫住我媽既名。
我永遠唔會忘記我爸喺深切治療插晒喉，講唔到野，用儀器機呼吸，注射緊強心針，但都要用盡佢最後一口氣寫同埋做口形話唔要見到我呢個親戚，同埋唔要見我媽，之後儀器係咁響，姑娘話病人太激動，一定要停止佢再激動。
更加唔會忘記有一幕，媽咪終於鼓起勇氣冒死都要黎ICU探一次爸爸，但竟然陪同媽咪黎既正正係呢個親戚（因為佢要俾能量支持住我媽行入醫院!)。
我打算陪佢一齊入去ICU，襟鐘向姑娘交待身份之後，門鎖解開，竟然呢個親戚想奪門而入，我立刻阻止，幸好仍有其他親人在場及時分隔開，如果唔係爸爸見到真係隨時有生命危險!!! (TVB劇情原來喺現實生活中真係會出現架!)
兩個月以來既辛苦除左係頻撲，經常出入醫院，回家不可接觸 Josie & Max, 一定要先從頭到腳大洗，隨後還有好多家務要完成。面對爸爸時替媽咪講好說話「你唔好怪佢啦，要怪就怪控制住佢嗰班人，佢想黎探你又黎唔到佢都唔好受」，對住變左另一個人既媽咪，要唔嬲佢，同情佢只係受害者，但又唔想放棄佢，極力說服佢，引導佢諗清楚成件事等等，簡直係EQ大考驗。
媽咪為住一句「唔通親戚會害我咩?!」同我地一家人抗衡左好耐，為左勸佢做大腸鏡檢查唔知鬧左幾多場交，情況就如談判，講到明無論結果如何，我尊重你，你要醫定唔醫，點樣醫係你自己話事，但至少做檢查驗清楚係乜野一回事，就算係大腸癌都要知道情況有幾 worse.
事件拖延左好耐，終於勸服成功，做左大腸内窺鏡檢查，當中發現既瘜肉經過化驗，全部都是良性，醫生證實大腸完全冇任何發炎，而媽咪既腸比較敏感(腸易激綜合症又名腸胃焦慮症)，並唔係某團體所講既一回事。
自此之後，媽咪開始清醒返好多，慢慢變番我真正既媽咪，正常飲食，體重增加番。
心痛係佢經歷左一段好長既恐懼歲月(完全係不必要既)，如果當時唔係出盡牙力去勸佢，真係唔病都變重病。
前陣子終於決定要遠行，去加拿大探望大家姐一家，雖然佢地仍然喜歡粗聲粗氣既相處方式，但見佢地兩口子為住呢個加拿大之旅外出 shopping 買褸買鞋，熱切期待今日起行，我真係覺得好感動，好感動。
( 出發齊齊送機～ )
( 成個下晝叫 Josie 瞓晏覺都扭扭擰擰，最終就到機場既十分鐘先黎瞓著 =.= )
( 公公只係需要靠學行架已經可以自己行，繼續努力! )
( 好彩老公特別請假幫手，如果唔係我實在冇能力處理兩個老人家＋兩個細路＋1大3小行李急+hand carry+輪椅＋學行架!!! )
( 兩隻嘩鬼喺機場跑跑跑 )
( check-in, 寄行李等等都好順利，要入閘啦～ )
( 玩得開心D, 玩耐D先好返呀! )
( little shopping at the airport )
( 送機之後去左爺爺嫲嫲屋企晚飯 )
( Josie & 爺爺 )
沒有留言:
張貼留言