一月初工人完約返印，預早用$8000 agent fee 重新請一個 oversea 既印傭，遲左黎三個星期，當中已經覺得頂得好辛苦，點之黎左只係 1.5 個月，完全貨不對版，頂唔順買$1500 機票送佢走，agent 都冇幫到咩手，雖然可以半價換另一個，但我已冇信心再花幾個月請另一個可能係類似既物體。
之後朋友介紹經 Hire Me Free 請左個斷約工人，我真係好抗拒斷約嗰D，總覺得係好既，人地就唔會唔用你，自己 break contract 既，break 得人地他日都可以 break 我…… 我要求 agent 幫我聯絡前僱主，想查詢一下佢既工作表現，agent 之後通知我話前僱主話：「人都走左，唔想再講」，我當時衰心急，唔想再過冇人幫既日子，interview 完就請左呢斷約菲傭。
請完又唔安落都係擔心，於是自己跟住個斷約工人既 contract 地址寄左封信俾前僱主，希望佢好心簡單話我知個工人請唔請得過，誰不知前僱主一收到信，知道我要請呢個工人照顧一個一歲三個月既Max，同3歲既 Josie, 即時同我傾左45分鐘詳談呢個工人超級唔掂既工作表現(全日發白日夢、精神不集中、不能跟從指示、練精學懶、得過且過、不可靠、不踏實、不老實、不可信、讓她照顧小朋友好危險、講好多次要啄住先做、講大話、向僱主借糧、博炒……)，與此同時查證得到 agent 根本冇問過佢願唔願意同新僱主對話，擺到明係唔想穿煲。
雖然已向消委會投訴，經過多次磋商，但對方依然唔肯賠，下一步可能係小額錢債，錢係一個問題，誠信係呢一個問題，我實在唔能夠接受咁無良既僱傭公司，只係為左促成生意，乜都唔會理，慶幸遇到一個肯合作既前僱主，如果唔係都係嘥時間，請左返黎又係倒貼機票送走。
經過呢兩單野之後，唔想再撞板，決定唔再心急，不斷向身邊既親朋戚友打探有冇完約工人，另一邊自己上網搵，當中同過50多個菲傭交涉，佢地真係揀工揀到爆，唔係住港島區就會嫌遠，冇工人房又唔制，曾經有兩三個差D成到事，又有一個好過份騎牛搵馬既簽好晒合約，所有文件入晒入境處，上工前一晚同我講唔做，仲要同我講 “I can have the right not to work
for u, and u can also have the right not to hire me!”, 嬲到爆炸!
最最最後竟然係因為喺 club house 貼既 memo, 請到一個只係喺香港完成第一個合約既工人，鄰居因為仔女一個升中一、一個升大學，又想佢地獨立D所以唔再請工人，深入了解佢既工作表現之後，大家你情我願簽左合約。
8月尾正式上工，告別7個月冇工人既日子，新工人表現良好，屋企非常整潔、好愛錫 Josie & Max, 煮野都唔錯，一切好快上手，所有野都自動波完成，終於覺得可以鬆一口氣，過返正常生活。
誰不知有一日佢話大仔入左院緊急地需要做手術，想同我地借錢，咁多個工人我都堅守唔借錢呢個原則，但今次事出突然，原來我對住一個喊到死既人係會心軟，就係咁我地借出左 $10,000。借係出於真心覺得佢好，我真係好滿意佢既表現，心諗覺得搵到個啱既人，想幫佢擺平件事，唔想因為咁冇左個人，諗住佢會報恩，以後更用心幫我做埋落去。
其間斷續地攞假話佢個仔ICU緊情況唔穩定，又話再需要錢，但我地已經表示唔再借，再之後就話個仔救唔返，要返菲辦身後事承諾十月尾返黎，結果一去冇回頭。
我即時通知入境處終止佢既 working visa, 同時間去埋警署備案。
其後搵到佢既朋友，同埋喺 facebook 搵到佢家人同個仔，知道一切都係大話，佢仔好健康，冇做過手術，亦都冇死，原來三張醫院收據都係偽造既，佢喺香港同菲律賓都係周身債，passport 都抵押埋俾債主，入境處查到佢冇出境紀錄，而家失蹤，全世界都搵緊佢。
唉～原來一直都處心積慮，當中騙左無數個大話，為左錢一個媽媽可以話自己個仔病重再死埋，簡直係最佳女主角，自編、自導、自演。好失望! 好憤怒!!!
之後終於物識到一間朋友介紹既僱傭公司，請過另一個全新未黎過香港既菲律賓工人，又捧上 $8180 agent fee, 再一次祝願自己好運，靜待2015二月中會有個正常既工人用。
由一月中到而家，使左幾萬蚊，用左勁多時間、花左好多心神，結果都係運吉。成年都係自己捱，爸爸媽咪身體既事、由 Max 一歲湊到兩歲呢年真係好辛苦、餵人奶既堅持等等，再加上最近信箱爆滿搬運公司既宣傳單張，心知不妙，上網睇睇原來業主賣左樓，超大鑊，一對手究竟可以做幾多野，呢個 2014 太過精彩了，救命!
請賜我正能量!!!
衰運過完！好運一定陸續有來嘅💪💪
回覆刪除hope so!
刪除謝謝支持 : )
加油呀, 好快聖誕啦, 跟家人過個開心聖誕!
回覆刪除祝願有個安好的2015 !
謝謝啊～
刪除