2012-01-21 新工人第一次獨自湊Josie

新工人上任第4日，暫時感受最大的分別係抺地方面........ 千幾呎既屋，舊工人可以只用一桶水，搓一次布極速抺晒(正確黎講係high一high, 因為根本冇出過力抺); 新工人只係一個客廳，抺完一個角落，會搓下塊布，再抺另一個角落，見到水污漕既話，會再開過另一桶抺第間房。

除左抺地方面，洗奶樽洗玩具都洗得極仔細。除左英文冇舊工人咁好之外，其餘野都好過舊o個個多多聲。一個吹水唔抺嘴，講野多過做野; 一個靜靜地默默地做，絕對係刻苦實幹型。

一個由朝到晚都做唔好D野，成4-5日先買一次餸，攪到我地成日冇新鮮野食; 一個將一屋清潔得妥妥當當唔使我粗心，做完有時間剩話出去買餸。

一個一日到黑要我寫紙仔，提佢做呢樣做o個樣，唔寫就借D二唔做；一個全程自動波攪掂晒。

一個我足足觀察半年先夠膽出街放手俾 Josie 佢照顧，一個到步4日我已偷雞出左街做 facial. 怪唔得用左佢4年既前僱主咁唔捨得佢，如果唔係佢要返去結婚生仔，今日都唔會落入我手中，新工人真係我既新年大禮物，希望以後都 KEEP住咁好。

( 近日 Josie 見我地將手指放入手偶，佢又有樣學樣^^
)