2008-07-28 火都黎埋!!! 離晒譜!!!!

籌備婚宴真係要做九萬幾個決定, 從擇日、訂酒席、婚紗攝影、新娘化妝、租衫 …… overall 黎講我都好滿意既, 最最最後悔就係婚宴攝影, 係唯一美中不足既部分.

我搵既並唔係職業既婚宴攝影, 而係朋友, 佢地係我以前舊校既
TA, 而家兩個都已經轉左行(做既係剪片工作), 但有業餘做婚宴攝影(一個攝影一個錄影), 好耐以前睇過佢影既相, 覺得 OK 既, 所以最終搵佢地兩個幫手.

之後因為整兒時片段 VIDEO, 我一直係同錄影師溝通, 直至 7月18日當晚,
錄影師竟然同我講聽日攝影師黎唔到, 真係晴天霹靂!!! 最後佢地搵左個人頂替, 雖然我好慶,
但都冇辦法, 唔通我就黎上頭都仲要同人嘈交咩?! 我都唔想影響自己辦喜事既心情.

結果 719 當天攝影錄影雙雙遲到, 影完兄弟佈置花車之後竟然冇黎到女家影野, 我連同一班姊妹合照既相都冇, 介紹姊妹既 video 亦都冇, 令我勁失望.

玩完一輪兄弟, 我終於出黎見人啦, 一出黎場面真係好熱鬧, 兄弟姊妹親戚同家人四十幾人在場, 人群中我見到有兩部相機瞄住我, 一部係天德, 一部係震宇,
後來我先見到大會部機, 實在太入門級, 我真係唔為意佢既存在, 同兩個兄弟部相機真係冇得比.

呢位臨時拉夫既攝影師真係唔多 OK, 唔多醒目, 亦都唔識叫人企位,
散席之後睇番D「即拍即發」黃黃紅紅咁, 仲濛濛地添, 真係好擔心.

事隔 9 日, 我地一直催促錄影師交片&交相俾我地, 同埋叫原本個攝影師打番俾我親口同我交代臨時甩底既原因, 講呢個電話既時候真係嬲到痺, 佢一 D 歉意都冇, 仲唔覺得自己做得唔好, 一味講「我都唔想架」, 仲覺得搵左個人黎已經係幫左我, 我嬲既係佢冇誠信同埋冇責任咁, 雖然黎唔到但點都應該自己親自去交代, 我話番俾佢知佢有乜野做得唔好, 佢竟然好悔氣咁同我 SAY SORRY, 仲話「你做老師既, 道理實o係你道!」

對於佢臨時甩底我起初都當佢唔係咁差, 只係真係有事黎唔到, 估唔到直接對話之後係咁令人失望, 佢唔覺得自己有問題, 仲將責任推俾其他人, 我講到攝影同埋錄影冇幫到我同姊妹影野, 佢竟然話「
我唔知你地點溝通 


」, 完全係自保兼置身事外, 極度過份!!!

呢 D 都算, 一直表現都 OK 既錄影師今日竟然同阿政講「
上晝段片冇收音 


」, 天啊~~~ 真係好想死, 嬲到爆炸, 呢 D 係我地好珍貴既回憶, 係冇辦法再補償架, 玩兄弟既片段我未睇過, 佢讀既愛的宣言我都係冇聽過, 上午斟茶時長輩既訓話好有意思, 我好想聽番, 但係呢 D 全部都冇晒聲, 我真係接受唔到. 最最最過份係佢下午知道左但而家事隔 9 日先講俾我地知, 當日唔講係唔想我地唔開心, 咁點解要到左今日阿政約佢出黎交收 D 相既時候先講呢?! 做錯左就係做錯左, 始終都要面對, 點解可以咁?!

我地真係勁唔開心, 呢D係幾多錢都補償唔到既野, 我真係好後悔好後悔, 係整個婚禮裏面我做左最後悔既一個決定. 佢兩個既行為真係太小朋友啦, 連工作應有既態度都未識, 今日你仲細你可能唔知道自己既錯係幾咁過份, 將來我深信你地會明白我地同你地講既「責任感、工作態度、專業…..」係乜野一回事, 亦都請你諗下如果你地結婚既時候遇到我既情況, 將心比己你自己會點?!

我真係好後悔!!!

安慰既係天德同埋震宇幫我地影左好多好多靚 SNAP, 
但係大會影既親戚朋友團體合照效果認真麻麻地 


, 真係唔好意思, 而家仲同佢地周旋中, 希望可以盡快調好 D 色先曬相俾大家.

                     

                                          ( 而家我既心情就好似佢咁……想殺人呀!)