講番尋日超多人黎拜年，所有人走左之後我就帶左 Josie 返房餵人奶，餵完出廳已經聽到鼻鼾聲，原來老爺奶奶已經訓到lum 一lum.
而我同老公就一直作戰到朝早7點先訓。
點之，冇耐就到老爺奶奶起身，洗頭沖涼加埋講野既聲，我根本訓唔到
我知道休息對人奶媽黎講好重要，但我真係休息唔到!!!
1)唔夠奶，奶奶完全冇準備上奶湯水俾我，結果係我自己上網搵，終於開口叫佢煲先有得飲
2)對聲音極度敏感既我，同講野大大聲、做野大大力既老爺奶奶完全夾唔到
3)因為奶奶既疏忽，CoCo 又再一次由露台出走，最終冇事，但攪到我冇一刻安落，成日驚CoCo再俾我老爺奶奶放走，唔係次次會咁好彩！我絕對絕對不能失去呢隻養左16多年既愛貓
(仲有太多太多，不過唔方便公開講！
)
休息至大約中午，出廳見到老爺奶奶準備出門口，原來佢地出去拜年，所以我尋日話奶奶完全唔記得自己黎既目的係陪我坐月，佢完全係黎過新年架，我真係冇講錯!
結果老爺奶奶唔o係度既一個下午，我反而過得好寧靜，好舒服，唔需要再躲o係房餵人奶，坐係SOFA餵仲舒服…… 跟住我忍唔住同老公講….. 不如唔使佢地陪月啦!
1)因為開刀生，頭三星期都冇得補，只係食清淡餸菜，工人已經幫到我
2)我餵人奶，老爺奶奶根本分擔唔到我既工作
3)醒訓方面我已經同工人夾得好好，佢識得就住黎做野唔會嘈到我(但我冇得開口叫老爺奶奶細聲D)
4)工人照顧得CoCo好好，我唔擔心，但老爺奶奶一日o係度，我一聽到露台門開關既聲都會發神經想衝出黎睇下CoCo係咪安全
可惜，我知道呢樣野好難開口，老公好為難……但我真係好唔開心，而家只係剛剛開始我已經覺得好辛苦，如果要夾硬頂落去，我真係會產後抑鬱!
陪月開初就係諗住有人會料理好晒我既起居飲食，令我可以安心去休息，但實情卻完全相反，奶奶整親俾我既食物大部分都係開刀禁忌，每次都俾D驚喜我，結果我攰到死對仲要成日上網查下佢整俾我食既野食唔食得。
好彩，到左夜晚，同奶奶講定聽日煮D咩俾我食(無錯，唔係奶奶自動波攪掂，而係要講俾佢知我可以食咩食咩)既時候，講下講下話其實我都唔係要食D乜野特別野補身，工人都煮到，佢自己話 “咁其實我地都唔使o係度過夜啦～”
YEAH～～～～～ 事情解決啦，佢地聽日會走
我知道呢件事上面一定得失左老爺奶奶，但我真係迫不得已，如果我唔為自己著想下，我真係擔心自己會顛左！事情總算暫時settle, 聽日開始應該可以有覺好訓啦
