2014-11-02 我的驕傲──全人奶14個月+2年

聽日 Max 兩歲啦! 我的人奶之路完滿結束啦!

由第一胎生 Josie 開始，我已決心要餵人奶，當中遇過好多問題(血管瘤留院、part-time代課……)，但我從未諗過放棄，去到邊餵到邊、泵到邊，最高峰每日餵十二餐，嚴重唔夠休息。經歷過冇工人既日子，泵奶、洗奶泵、儲奶、翻熱人奶真係好花時間，但都一關一關地捱過。

因為有左 Max 又嘔又痛，最終 Josie 全人奶14個月冇再餵落去。

直至 Max 出世，

我再一次決心餵人奶，而且要全埋身餵，告別泵奶既麻煩，但換來係極度困身，永遠同 Max 形影不離，佢連一個奶樽都未用過，每一餐都係我自己包辦，從未假手於人.....卻犧牲了我的日常社交，每一個行程都會遷就餵奶時間，跟朋友晚飯、聚會等時間少之又少。

成功全人奶一個月、三個月、半年之後，我開始訂下一個更遠既目標，就係按世衛既標準餵至兩歲，我真的做到了!!!

由 2010 年 4 月陀 Josie 開始，直至今日，歷時 4 年半，為左 Josie & Max 既健康，小心飲食、不電髮、不染髮、不塗指甲油、沒飲過一口紅酒、化妝次數應該十隻手指一定數完……唔容許自己病、真係病左都會死頂唔食藥，為的是盡量「無添加」。

如果餵人奶可以令 Josie & Max 健康成長，受惠一生，我這4年半既犧牲太值得了，就當是送給他們最好的禮物吧 : )

我已任務完成啦，希望身邊仍努力中、打算努力既朋友堅持下去，亦請她們身邊既親人、上司、同事、朋友多多支持佢地，呢條路真係好唔容易行。

共勉之～