2008-09-30 廉價勞工

今日第一日開工, 幫了幾隻貓狗剪甲、磨甲、剪腳板底毛、拔耳毛、洗耳仔、剷毛、沖涼,
全日冇乜停過手, 最辛苦係臨收工洗籠、抹籠、抹玻璃,
o個一刻有 D 後悔揀左呢間規模比較大既寵物店,
抹死自己! 

夜晚有一鐘食飯, 我真係好唔習慣一個人食飯,
平時迫不得已要自己食我會選擇外賣, 但今日要出去一個人食,
以後要習慣下啦! 

今日其實有件好唔開心既事, 就係老闆更正我既番工時間係
1 PM, 唔係 2PM, 我真係勁唔開心,
我有極力同佢爭取照番 2PM, 因為見工時真係咁講,
我計過數先肯做既, 而家突然每日番多一個鐘,
一個月成 26 個鐘,
變相等於番多 3日, 但人工不變!
有冇攪錯?!

老闆竟然話自己講錯左, 同埋另一個妹妹仔都係番
1PM, 如果我番 2PM 對呢個妹妹仔好唔
fair

實情我覺得係對我唔 fair, 好唔開心!

基本上我只有兩個選擇, 一係番 1PM, 一係唔做!

如果我聽日照番 2PM,
你估會點呢? ( 肯定唔使再番都得啦! )

唉~ 我真係好唔習慣, 咁屈就咁辛苦,
話晒教開書, 搵開比較多錢, 同埋叫做得到學生、同事、家長既尊重,
一下子做左廉價勞工, 轉變實在太大.

除左教書/代課之外, 我兼職補習既人工,
補 1.5小時,
已經等於而家o係寵物店做一日既錢, 真係好辛苦呀!

原本我訂既目標係一個月, 而家可能要改一改啦, 做到一星期先再算.
我實在不能忍受吸二手煙!!!  (全間舖計埋我得四個人, 但佢地3個都吸煙)   . 我會嘗試搵下其他更好既工作環境.

做完一日, 我雙手已經超”鞋”
, 仲好多抓痕, 聽日阿政放工番黎見到都會心痛

我唔會咁快放棄架, 做得呢份工就預左唔係搵錢, 係搵經驗, 我要繼續努力!